ԳՊՀ ՈՒՍԱՆՈՂՆԵՐԸ՝  ‹‹ԱՐԵՆԻ›› ԳԻՆՈՒ ԳՈՐԾԱՐԱՆՈՒՄ

Գավառի  պետական համալսարանի  տնտեսագիտական  ֆակուլտետի  դեկան Սամվել Ամիրխանյանի նախաձեռնությամբ  ֆակուլտետի  ուսանողների  համար  կազմակերպվեց  հերթական մեկօրյա  արտադրական  պրակտիկա:

Նման  պրակտիկաները   կարևորվում  են  ուսանողների  գործնական  կարողությունները  զարգացնելու  առումով:

ԳՊՀ ուսանողներն  այցելեցին  ՀՀ Վայոց  Ձորի  մարզի  Արենի  գյուղ` Սիմոնյանների  ընտանիքի  կողմից հիմնադրված  «Արենի գինու գործարան»  ՓԲԸ:

Արենի գինու գործարանի   համահիմնադիր տիկին  Գայանեի  ուղեկցությամբ ուսանողները  ծանոթացան գինու արտադրման գործընթացի բոլոր փուլերին, գոր­­­ծա­­րա­­նում կիրառվող նորագույն  տեխնոլոգիաներին, գինու արտադրման  առանձնահատկություններին:

«Ներկայումս  օգտագործվող  հումքը  սեփական  արտադրության  խաղողն է: Պտուղների թագուհի  խաղողը երկար ճանապարհ է անցնում մինչև  հայոց  նահապետական  գինու վերածվելը: Լավ գինի ստանալու  համար կարևոր է  հումքի  բարձր  որակը, իսկ  լավորակ խաղող  ստանալու  հիմնական պայմաններից մեկը  այն նախապես ճիշտ  մշակելն է»,- նշեց  տիկին  Գայանեն՝ մանրամասն նկարագրելով խաղողի մշակման փուլերը, ապա  արտադրության  նախապատրաստման և  տեխնոլոգիական  գործընթացները:

Շրջայցը  շարունակվեց  գինու  պահեստավորման  սրահում, որտեղ  ուսանողները  ծանոթացան  գինու  պահպանման  պայմաններին:

Բազմաթիվ հարցերից ու հանգամանալից պատասխաններից հետո ուսանողներն  արձանագրեցին, որ գործարանի արտադրանքը մրցունակ  է, սիրված ու պահանջված  սպառողների կողմից, քանի որ  այն պատրաստվում  է  «Արենի»  տեսակի  խաղողից, խնամքով և ճիշտ տեխնոլոգիայով։ Ուրախալի է, որ  արտադրանքն  արտահանվում  է  ոչ  միայն  Ռուսաստան, այլև  Եվրոպա, Չինաստան ու Ավստրալիա:

Գործարանում ուսանողների ուսուցողական  շրջայցն  ավարտվեց  «Արենի»  գինու  մասին  պատմող  ֆիլմի   դիտումով:

Այնուհետև  ուսանողները  եղան  Նորավանքում  և Նորավանքի  կիրճում, Արփա գետի ափին գտնվող Արենիի քարանձավում: Տպավորիչ էր Արենիի  հնավայրը, որը հայտնի է նաև «Թռչունների քարանձավ» անունով: Այնտեղ 2010 թ.-ին հայտնաբերվել է աշխարհի ամենահին կոշիկը, 2011 թ.-ին՝ կանացի կիսաշրջազգեստ՝ վերագրված մ.թ.ա. 3900 թ.-ին, իսկ 2011 թ.-ի հունվարից հայտնի է նաև աշխարհի առաջին գինու գործարանով: Այսպիսով, գեղեցիկ ու հագեցած օրն ուսանողների համար ունեցավ նաև հայրենաճանաչողական նշանակություն։